उघडा डोळे बघा नीट, कितींदा दिलेय क्लीनचिट…

मध्यंतरी शरद पवारांनी मुख्यमंत्री देवेंद्र फडणवीसांवर बालिश मुख्यमंत्री म्हणून टिका केली होती. पण प्रत्यक्षात मात्र देवेंद्र फडणवीसांना लोकं मुत्सदी राजकारणी म्हणून ओळखू लागले आहे. आपल्या मंत्र्यांवर झालेल्या आरोपांना क्लीनचिट देण्याची एक नवीनच प्रथा मुख्यमंत्री देवेंद्र फडणवीस यांनी सुरू केली. आत्तापर्यन्त तब्बल दहा प्रकरणात मुख्यमंत्र्यांनी क्लीनचिटचा वापर केला असून यापैकी ५ मंत्र्यांना क्लीनचीट ही आपल्या वाढदिवसाच्या मुहूर्तावर मुख्यमंत्र्यांनी दिली होती. 

काल मुख्यमंत्र्यांनी संभाजी भिडे गुरूजींना क्लीनचीट देत दूहेरी आकडा साध्य केला. पाहूया मुख्यमंत्र्यांनी आजपर्यन्त किती क्लीनचिट दिल्या आहेत. 

१) जयकुमार रावल (पर्यटनमंत्री).  

  • आरोप – दोंडाईचा येथील दादासाहेब रावल सहकारी बँक तोट्यात जाण्यास जय कुमार रावल व कुटुंबीयांचा मनमानी कारभार कारणीभूत असल्याचा लेखापरीक्षणातील ठपका ठेवण्यात आला. या प्रकरणात गुन्हे दाखल करण्यात आले. संचालक असणाऱ्या रावल कुटुंबीयांनी बँकेतून नियमबाह्य पद्धतीने कोट्यावधींचे रुपयांचे कर्ज घेतले. मात्र गुन्हे दाखल झाल्यानंतर टप्प्याटप्प्याने रक्कम भरण्यात आली. दादासाहेब रावल बँकेच्या संपूर्ण व्यवहाराची धुळे एसआयटीकडून चौकशी पूर्ण करण्यात आली. रावल यांना वाचविण्यासाठी मुख्यमंत्र्यांनी या प्रकरणाचा तपास धुळे एसआयटीकडून काढून घेत तो सीआयडीकडे सोपविल्याचा विरोधकांनी आरोप केला.
  • क्लीनचीट – “कर्ज घोटाळ्यात जयकुमार रावलांवर झालेले आरोप हे राजकिय द्वेषातून झाले असल्याचे त्यांना दोषी धरता येणार नाही अस स्पष्टीकरण मुख्यमंत्री फडणवीस यांनी दिल.

२)  विष्णू सावरा (आदिवासी विकास मंत्री). 

  • आरोप – आदिवासी मुलांना रेनकोट खरेदीत एकाच व्यक्तीने एकाच कॉम्प्युटरवर वेगवेगळे दरपत्रक तयार केले आणि त्याच व्यक्तीला ठेका देण्यात आल्याचा आरोप विरोधकांनी केला.
  • क्लीनचिट – या प्रकरणात विष्णू सावरांची चुक नसुन आदिवासी विकास विभागातील कॉन्ट्रक्टरनी हा घोटाळा केल्याचं सांगत देवेंद्र फडणवीसांनी क्लिनचीट दिली.

 

source- hindu jagruti

३) गिरीश महाजन (जलसंपदा मंत्री ).

  • आरोप – भुसावळ तालुक्यातील मानपूर येथील जमीन २००१ साली महाजन यांच्या नावावर असताना निवडणुकीच्या शपथ पत्रात उल्लेख न केल्याने निवडणूक आयोगाचा सूचनांचा भंग केल्याचा आरोप. गिरीश महाजन यांनी ४ हेक्टर ९७ आर शेतजमीन २००१ साली तापी पूर्णा शुगर अन्ड अलाइड प्रोजेक्टसाठी खरेदी केली होती. कारखान्याचे मुख्य प्रवर्तक एकनाथ खडसे शिवाय संपर्क पत्ता खडसे यांचा कोथळी तालुका मुक्ताईनगर घरचा पत्ता होता. खाजगी कारखान्यासाठी एकत्रित ४० एकर जागा घेणे शक्य नसल्याने संचालक म्हणून गिरीश महाजन यांनी ही जमीन खरेदी केली होती. मात्र हा कारखाना अस्तित्वात नाही. शपथपत्रात या जमिनीची कोणतीच माहिती गिरीश महाजन यांनी गिली नव्हती.
  • क्लीनचीट“गिरीश महाजनांनी ती जमिन परत देवून टाकली असल्याचे” सांगत फडणवीसांनी त्यांना क्लिनचिट दिली.

४) सुभाष देशमुख, (सहकार पणन व वस्त्रउद्योग मंत्री). 

  • आरोप – ८ नोव्हेंबर २०१६ साली झालेल्या नोटबंदीनंतर सुभाष देशमुख यांच्या लोकमंगल समुहाच्या गाडीत ९१ लाख रु सापडले होते.
  • क्लिनचीट“या प्रकरणात देशमुखांनी या पैशाबाबत आपल्याला दिलेल्या स्पष्टीकरणाबाबत आपण समाधानी असून या प्रकरणाची पुढील कारवाई करण्याची गरज नसल्याचे” फडणवीसांनी सांगितले. (हे पैसे कामगारांच्या पगाराचे असल्याचे सुभाष देशमुख यांनी सांगितले होते)

 

५) रविंद्र वायकर (गृहनिर्माण राज्यमंत्री).  

  • आरोप – आरे कॉलनीतील २० एकर जागा व्यायामशाळा निर्माण केल्याचा आरोप. अनधिकृतपणे जागा घेवून व्यायामशाळा बांधण्यात आली.
  • क्लीनचीट – शिवसेनच्या मंत्र्याविरोधात होणारे आरोप निराधार असून ते राजकिय प्रेरित आहेत सांगत क्लिनचिट देण्यात आली.

६) संभाजी निलंगेकर (कामगारमंत्री).

  • आरोप – मेहुणे आणि अन्य नातेवाईक संचालक असलेल्या व्हिक्टोरिया फूड प्रोसेसिंग कंपनीस एकूण ४९ कोटी रु. कर्जासाठी जामीनदार करण्यात आलं. त्यासाठी लीजने मिळालेली जमीन तारण ठेवल्याचा आरोप विरोधकांनी केला. एकूण ७२ कोटी रुपयांची थकबाकी. लातूर न्यायालयात दोषारोपपत्र दाखल.कर्जाच्या मोबदल्यात गहाण ठेवलेल्या जमिन प्रकरणात गुन्हा दाखल झाला.
  • क्लीनचीट – “हे प्रकरण म्हणजे कौंटुबिक आणि राजकिय भांडण असून यात निलंगेकरांची चूक नसल्याचं मुख्यमंत्र्यांनी सांगितलं.
source- RSP

७) महादेव जानकर (पशुसंवर्धन व दूग्धविकासमंत्री)

  • आरोप – गडचिरोलीतील निवडणूक अधिकाऱ्यांवर दबाव टाकण्याचा प्रयत्न करणारी VOICE CLIP व्हायरल झाल्यानंतर जानकरांवर गुन्हा नोंद करण्यात आला होता.
  • क्लीनचीट – या प्रकरणात न्यायालयाचा निकाल येण्याआधीच महादेव जानकर हे मोठ्याने बोलतात पण अधिकाऱ्यांना धमकावण्याचा त्यांचा उद्देश नव्हता अस सांगून त्यांचा बचाव केला.

८) प्रकाश मेहता (गृहनिर्माण मंत्री). 

  • आरोप – ताडदेव येथील M.P. मिल कंपाउंडच्या पुर्नविकास प्रकल्पात खाजगी बांधकाम व्यावसायिकांचा फायदा करुन दिल्याचा आरोप करण्यात आला .
  • क्लीनचीट – आरोप झाल्यानंतर या प्रकल्पाला दिलेली मान्यता फडणवीसांनी रद्द केली आणि या प्रकल्पाचे काम सुरूच झाले नसल्याचे सांगत फडणवीसांनी प्रकाश मेहतांना या आरोपातून क्लिनचिट दिली.

९) हरिभाउ बागडे (विधानसभा अध्यक्ष). 

  • आरोप – हरिभाउ बागडे यांच्या कामकाज पद्धतीवर आक्षेप घेत त्यांच्या विरोधात विरोधकांनी अविश्वास ठराव मांडण्यात आला मात्र हा ठराव चर्चेला आणण्यात येणार होता.
  • क्लीनचिट – ठराव चर्चेला येण्यापुर्वीच फडणविसांनी बागडे यांच्यावर विश्वासदर्शक ठराव मांडून एक प्रकारे क्लिनचिट दिली.

 

१०) संभाजी भिडे ( संस्थापक शिवप्रतिष्ठान )

  • आरोप – जानेवारी २०१८ ला भिमा कोरेगाव येथे झालेल्या दंगलीत संभाजी भिडे आणि मिलींद एकबोटे हे प्रमुख आरोपी असल्याचे गुन्हे नोंद करण्यात आले. मिलींद एकबोटेंना अटक करण्यात आली मात्र संभाजी भिडेंना अटक का केली जात नाही याबाबत विरोधकांनी जाब विचारला.
  • क्लीनचिट– संभाजी भिडे यांच्या संदर्भात एका महिलेने तक्रार केली की त्यांनी भिडेंना त्या ठिकाणी पाहिलं होतं. त्यानंतर आपण सगळे पुरावे तपासले. मात्र त्यानुसार संभाजी भिडे यांच्या विरोधात एकही पुरावाही मिळाला नसल्याचं मुख्यमंत्री देवेंद्र फडणवीस यांनी विधानसभेत सांगितलं.

 

LEAVE A REPLY

Please enter your comment!
Please enter your name here